စင်ကာပူလမ်းမပေါ်က စည်းကမ်းမဲ့မှုများ ဖောက်ဖျက်မှု
စင်ကာပူလမ်းမပေါ်က စည်းကမ်းမဲ့မှုများ နှင့် ဖောက်ဖျက်ပါက ကျသင့်မည့် ဒဏ်ကြေးများ
ပြီးခဲ့သည့် ၂၀၂၅ ခုနှစ်၊ ဒီဇင်ဘာလ ၂၈ ရက်နေ့က စင်ကာပူနိုင်ငံ HarbourFront မှ Geylang သို့ မောင်းနှင်နေသည့် ဘတ်စ်ကားပေါ်ပါ ခရီးသည်တစ်ဦးသည် လမ်းခရီးတစ်လျှောက်တွင် စည်းကမ်းမဲ့ စက်ဘီးစီးနင်းနေသည့် အဖွဲ့အတော်များများကို မြင်တွေ့ခဲ့ရသဖြင့် ဗီဒီယိုမှတ်တမ်းတင်ကာ Stomp သတင်းဌာနသို့ ပေးပို့ခဲ ့ပါတယ်။
အဆိုပါ သတင်းပေးပို့သူ က "ဒါဟာ တကယ့်ကို မယုံနိုင်စရာပါပဲ၊ အပတ်စဉ် ရုံးပိတ်ရက်တွေနဲ့ အစိုးရရုံးပိတ်ရက်တွေရောက်တိုင်း လမ်းမတွေပေါ်မှာ စက်ဘီးစီးနေကြတာဟာ မြင်နေကျ မြင်ကွင်းတစ်ခုလို ဖြစ်နေပြီ" ဟု စိတ်ပျက်လက်ပျက် ပြောကြားခဲ့ပါတယ်။
အထူးသဖြင့် စိုးရိမ်စရာအကောင်းဆုံးအချက်မှာ လူငယ်တစ်စုသည် ဘေးကင်းလုံခြုံရေး အကာအကွယ်ပစ္စည်းများ လုံးဝဝတ်ဆင်ထားခြင်းမရှိဘဲ စက်ဘီးများကို စီးနင်းနေကြခြင်းဖြစ်ပြီး လမ်းဆုံတစ်ခုတွင် မီးနီနေစဉ် ဖြတ်မောင်းသွားခြင်းများကိုပါ ပြုလုပ်ခဲ့ကြခြင်းဖြစ်ပါတယ်။
သတင်းပေးပို့သူ၏ အဆိုအရ ၎င်းတို့စီးနင်းသည့် စက်ဘီးများသည် ခိုင်ခံ့မှုမရှိဘဲ လွန်စွာပင် အန္တရာယ်ရှိပုံပေါ်နေပြီး ဦးထုပ်ဆောင်းထားခြင်းလည်း မရှိကြောင်း သိရပါတယ်။
စင်ကာပူပို့ဆောင်ရေးအာဏာပိုင်အဖွဲ့ (LTA) ၏ စည်းမျဉ်းအရ လမ်းမ ပေါ်တွင် စက်ဘီးစီးနင်းပါက အကာအကွယ်ဦးထုပ် မဖြစ်မနေ ဆောင်းရမည်ဖြစ်သလို၊ အခြားယာဉ်များကို လမ်းပေးနိုင်ရန် လမ်း၏ဘယ်ဘက်အစွန်ဆုံးမှ ကပ်၍စီးနင်းရမည်ဖြစ်ပြီး အဖွဲ့လိုက်စီးနင်းပါကလည်း သတ်မှတ်ထားသည့် လူဦးရေထက် မကျော်လွန်စေရန် တင်းကြပ်စွာ ကန့်သတ်ထားသော်လည်း ယခုဖြစ်ရပ်တွင်မူ ထိုစည်းကမ်းများကို လိုက်နာခြင်းမရှိသည်ကို တွေ့မြင်ရပါတယ်။
ယခုကဲ့သို့ စည်းကမ်းမဲ့ စက်ဘီးစီးနင်းမှုများကြောင့် မတော်တဆမှုများ ဖြစ်ပွားပါက အသက်အန္တရာယ်အထိ ထိခိုက်နိုင်ပြီး ယခင်ကလည်း Admiralty Drive တွင် ဘတ်စ်ကားအောက် ရောက်ရှိကာ စက်ဘီးသမားတစ်ဦး သေဆုံးခဲ့ရသည့် ဝမ်းနည်းဖွယ်ဖြစ်ရပ်များ ရှိခဲ့ဖူးပါတယ်။
လမ်းမထက်တွင် စည်းကမ်းမဲ့စွာ သွားလာနေသူများကြောင့် အပြစ်မဲ့သော လမ်းသွားလမ်းလာများနှင့် အခြားယာဉ်မောင်းသူများမှာ အန္တရာယ် ဖြစ်လာနိုင်သည့်အတွက် တာဝန်ရှိသူများအနေဖြင့် ထိရောက်စွာ အရေးယူပေးရန် အများပြည်သူက လိုလားနေကြပါတယ်။
စင်ကာပူနိုင်ငံ လမ်းမပေါ်တွင် စက်ဘီးစီးနင်းသူများ လိုက်နာရမည့် အခြေခံစည်းမျဉ်းများနှင့် ဖောက်ဖျက်ပါက ကျသင့်မည့် ဒဏ်ကြေးများကိုပါ စုစည်းဖော်ပြပေးလိုက်ပါတယ်။
စင်ကာပူပို့ဆောင်ရေးအာဏာပိုင်အဖွဲ့ (LTA) သည် လမ်းမထက် ဘေးကင်းလုံခြုံရေးအတွက် စက်ဘီးသမားများ လိုက်နာရမည့် စည်းကမ်းများကို တင်းကြပ်စွာ ချမှတ်ထားပါတယ်။
၁ အကာအကွယ်ဦးထုပ် (Helmet) ဆောင်းခြင်း
စည်းကမ်း လမ်းမပေါ်တွင် စက်ဘီးစီးနင်းသူတိုင်းသည် အကာအကွယ်ဦးထုပ် (Helmet) ကို စနစ်တကျ မဖြစ်မနေ ဆောင်းရပါမယ်။ (စက်ဘီးစီးလမ်း သို့မဟုတ် လူသွားလမ်းပေါ်တွင် စီးလျှင်မူ ဆောင်းရန် မလိုပါ)
ဒဏ်ကြေး လမ်းပေါ်တွင် ဦးထုပ်မဆောင်းဘဲ စီးနင်းပါက $150 ဒဏ်ရိုက်ခံရပါမယ်။
၂ အဖွဲ့လိုက် စီးနင်းခြင်း (Group Size)
စည်းကမ်း လမ်းမပေါ်တွင် အဖွဲ့လိုက်စီးပါ က အများဆုံး ၁၅ ပေ (၅ စီးစာ) ထက် ပိုမရှည်ရပါ။ ဆိုလိုသည်မှာ တစ်တန်းတည်းစီးလျှင် ၅ ဦး၊ နှစ်တန်းယှဉ်စီးလျှင် ၁၀ ဦးထက် မကျော်ရပါ။
ဒဏ်ကြေး သတ်မှတ်ထားသည့် လူဦးရေထက် ကျော်လွန်စီးနင်းပါက $150 ဒဏ်ရိုက်ခံရပါမယ်။
၃ လမ်းသွားလမ်းလာနှင့် မီးပွိုင့်စည်းကမ်း လိုက်နာခြင်း
စည်းကမ်း မီးနီဖြတ်မောင်းခြင်း မပြုရ၊ လမ်းပြောင်းပြန် မစီးရသည့်အပြင် အခြားယာဉ်များကဲ့သို့ပင် မီးပွိုင့်နှင့် လမ်းညွှန်အမှတ်အသားများကို လိုက်နာရပါမယ်။
ဒဏ်ကြေး မီးနီဖြတ်ခြင်း သို့မဟုတ် လမ်းပြောင်းပြန်စီးခြင်းများအတွက် $150 ဒဏ်ရိုက်ခံရပါမယ်။
၄ လမ်းပေါ်တွင် စီးနင်းရမည့် နေရာ
စည်းကမ်း လမ်း၏ ဘယ်ဘက်အစွန်ဆုံး (Far-left edge) ကပ်၍သာ စီးနင်းရပါမယ်။ အဝေးပြေးလမ်းမကြီးများ (Expressways) နှင့် ကားလမ်းဥမင်လိုဏ်ခေါင်းများ (Road Tunnels) ထဲတွင် စီးနင်းခွင့် လုံးဝမရှိပါ။
ဒဏ်ကြေး အဝေးပြေးလမ်းပေါ်တွင် စီ းနင်းပါက အနည်းဆုံး $150 ဒဏ်ရိုက်ခံရမည့်အပြင် တရားရုံးသို့ တိုင်ကြားခံရပါက ဒဏ်ငွေ $2,000 အထိ ပေးဆောင်ရနိုင်သလို ထောင်ဒဏ် ၆ လအထိလည်း ကျခံရနိုင်ပါတယ်။
၅ အန္တရာယ်ရှိစွာ စီးနင်းခြင်းနှင့် ဖုန်းအသုံးပြုခြင်း
စည်းကမ်း စက်ဘီးစီးနေစဉ် လက်ကိုင်ကို လွှတ်စီးခြင်း သို့မဟုတ် လက်တစ်ဖက်ဖြင့် ဖုန်းအသုံးပြုခြင်းများကို တားမြစ်ထားပါတယ်။
ဒဏ်ကြေး စက်ဘီးစီးရင်း ဖုန်းကိုင်ဆောင်အသုံးပြုပါက ပထမအကြိမ်တွင် ဒဏ်ငွေ $1,000 အထိ ပေးဆောင်ရနိုင်ပြီး ထောင်ဒဏ် ၃ လအထိ ကျခံရနိုင်ပါတယ်။
မှတ်ချက်: အကယ်၍ စက်ဘီးသမားတစ်ဦးသည် အထက်ပါစည်းကမ်းများကို အကြိမ်ကြိမ်ချိုးဖောက်ခြင်း သို့မဟုတ် အပြင်းအထန် ဖောက်ဖျက်ခြင်းများ ပြုလုပ်ပါက ဒဏ်ငွေမှာ $2,000 မှ $5,000 အထိ တိုးမြှင့်ခံရနိုင်ပြီး ထောင်ဒဏ်လည်း ကျခံရနိုင်ပါတယ်။
Pedestrian-only Path (ခြေလျင်လျှောက်သူသီးသန့်လမ်း) တွေပေါ်မှာ စက်ဘီးစီးနင ်းခြင်းဟာလဲ ဥပဒေအရ တားမြစ်ထားတဲ့အချက်ဖြစ်ပါတယ်။ အဲဒီအတွက် စည်းကမ်းချက်နဲ့ ဒဏ်ကြေးတွေကို လဲဖော်ပြပေးလိုက်ပါတယ်။
စင်ကာပူမှာ လမ်းကို (၃) မျိုးခွဲခြားထားပါတယ်။
ခြေလျင်လမ်း (Pedestrian-only path)
မျှဝေသုံးစွဲသည့်လမ်း (Shared path - ဥပမာ PCN) နှင့်
ကားလမ်း (Road) တို့ဖြစ်ပါတယ်။
"Pedestrian-only path" ဟု ဆိုင်းဘုတ်ပြထားသည့် လမ်းများပေါ်တွင် စက်ဘီးစီးနင်းခွင့် လုံးဝမရှိပါ။ ထိုလမ်းများပေါ်တွင် စက်ဘီးကို တွန်း၍သာ သွားရပါမည်။
ဒဏ်ကြေး (Penalty) ခြေလျင်လျှောက်သူသီးသန့်လမ်းပေါ်တွင် စက်ဘီးစီးနင်းရင်း ဖမ်းဆီးခံရပါက ဒဏ်ငွေ $2,000 အထိ ချမှတ်ခံရနိုင်သည့်အပြင် (၃) လထက်မပိုသော ထောင်ဒဏ်လည်း ကျခံရနိုင်ပါတယ်။ (ပထမအကြိမ် ကျူးလွန်သူများအတွက် နေရာတင်ဒဏ်ရိုက်ခြင်း (Composition fine) အနေဖြင့် $300 ဝန်းကျင် ပေးဆောင်ရလေ့ရှိသော်လည်း အမှုကြီးပါက တရားရုံးအထိ ရောက်ရှိနိုင်ပါတယ်)။
မှတ်သားရ န် အကယ်၍ သင်သည် ခြေလျင်လမ်းပေါ်တွင် စက်ဘီးစီးရင်း လမ်းလျှောက်နေသူကို တိုက်မိခဲ့ပါက ဒဏ်ငွေ $5,000 အထိ တိုးမြှင့်ခံရနိုင်ပြီး ထောင်ဒဏ် (၆) လအထိ ကျခံရနိုင်ပါတယ်။
ယာဉ်စည်းကမ်း လမ်းစည်းကမ်းကို လေးစားလိုက်နာခြင်းသည် မိမိအသက်ကိုသာမက အခြားသူများ၏ လုံခြုံရေးကိုပါ စောင့်ရှောက်ရာရောက်သဖြင့် အပျော်စီးစက်ဘီးသမားများအနေဖြင့် စည်းကမ်းများကို တိကျစွာ လိုက်နာသင့်ကြောင်း တိုက်တွန်းဖော်ပြလိုက်ရပါတယ်။
လမ်းမထက်က ခဏတာ ပျော်ရွှင်မှုဟာ တစ်သက်တာ နောင်တမဖြစ်စေဖို့ ယာဉ်စည်းကမ်းကို အစဉ်တစိုက် လေးစားလိုက်နာကြပါရန် အကြံပြုအပ်ပါတယ်။
Source: Stomp