နီပေါတွင် ဟိန္ဒူအမျိုးသမီးများ၏ တစ်လကြာ အစာရှောင်သ
နီပေါတွင် ဟိန္ဒူအမျိုးသမီးများ၏ တစ်လကြာ အစာရှောင်သည့် ဝတ်ပြုဆုတောင်းပွဲ ပြုလုပ်
နီပေါနိုင်ငံ၊ ခတ္တမန္ဒူမြို့ရှိ Sali Nadi မြစ်ကမ်းနားတွင် ဟိန္ဒူအမျိုးသမီးများ တစ်လကြာမြင့်မည့် စုပေါင်းဝတ်ပြုဆုတောင်းပွဲကို ဇန်နဝါရီလ ၇ ရက်နေ့က စတင်ခဲ့ကြသည်။
'Madhav Narayan' (မာဓပ် နာရာယန်) ဟု အမည်ရသည့် အဆိုပါ ဘာသာရေးပွဲတော်တွင် အစာရှောင်ခြင်း၊ ရေစင်သွန်းချခြင် းနှင့် Swasthani နတ်ဘုရားမအား ရည်ညွှန်းပူဇော်ထားသည့် Swasthani ကျမ်းစာကို လေ့လာခြင်းတို့ ပြုလုပ်ကြသည်။
ယခုဘာသာရေးကျင့်စဉ်တွင် အစာရှောင်သူများသည် တစ်နေ့လျှင် ညနေခင်းအချိန်၌ တစ်နပ်တည်းသာ စားသုံးခွင့်ရှိပြီး ကျန်ရှိသော အချိန်များတွင် ရေဖြင့်သာ အဓိက အားဖြည့်ကြရသည်။
စားသုံးသည့် အစားအစာတွင်လည်း အသား၊ ငါးနှင့် ကြက်သွန်တို့ကို လုံးဝရှောင်ကြဉ်ရသည့်အပြင် ဆား ကိုလည်း အသုံးမပြုဘဲ သစ်သီးဝလံနှင့် နို့ထွက်ပစ္စည်းများကဲ့သို့သော သတ်မှတ်ထားသည့် သက်သက်လွတ် အစားအစာများကိုသာ ရိုးရှင်းစွာ စားသုံးကြရသည်။
ယင်းကဲ့သို့ အစားအသောက် ကန့်သတ်ခြင်းသာမက နေ့စဉ်မနက်စောစောတွင် မြစ်အတွင်း၌ ကိုယ်လက်သန့်စင်ခြင်း၊ ဘုရားကျောင်းများတွင် စုပေါင်းနေထိုင်ခြင်းနှင့် Swasthani ကျမ်းစာများကို ဖတ်ကြားပူဇော်ခြင်းတို့ကိုလည်း တစ်လတိတိ တစိုက်မတ်မတ် လုပ်ဆောင်ကြရသည်။
ညနေခင်းတိုင်းတွင် ဘာသာရေးခေါင်းဆောင်များ သို့မဟုတ် အိမ်ထောင်ဦးစီးများက စုဝေးရောက်ရှိနေသည့် မိသားစုဝင်များအား ကျမ်းစာလာ ဇာတ်လမ်းတစ်ပုဒ်စီကို ဖတ်ကြားပြသည်။
အိမ်ထောင်မရှိသေးသည့် အမျိုးသမီးများက သင့်တော်သော ခင်ပွန်းကောင်းရရှိရန် အစာရှောင်ကြသလို အိမ်ထောင်သည်အမျိုးသမီးများက မိသားစု၏ စီးပွားလာဘ်လာဘ တိုးတက်စေရန် အစာရှောင်ဆုတောင်းကြခြင်း ဖြစ်သည်။
ယခုပွဲတော်ကာလအတွင်း ဘုရားကျောင်းအသီးသီးတွင်လည်း အိမ်ထောင်သည်အမျိုးသမီးများစွာနှင့် အမျိုးသားဝတ်ပြုဆုတောင်းသူများကလည်း ပိုမိုကောင်းမွန်သော ဘဝနှင့် တိုင်းပြည်ငြိမ်းချမ်းရေးအတွက် တစ်လကြာ အစာရှောင်ဆုတောင်းမှုများကို ပြုလုပ်ကြသည်။ (ဓာတ်ပုံ- EPA)