မဲဆောက်ရဲစခန်းမှ ရဲတပ်ကြပ်ကြီးအတွက် မြန်မာအများမျာ
မဲဆောက်ရဲစခန်းမှ ရဲတပ်ကြပ်ကြီးအတွက် မြန်မာ အများအပြား သွေးသွားရောက်လှူဒါန်း
ဇန်နဝါရီ၂၁
ထိုင်းနိုင်ငံ ၊ တာ့ခ်ခရိုင်၊ မဲဆောက်မြို့နယ် ၊ မဲဆောက်ရဲစခန်းမှ ရဲတပ်ကြပ်ကြီးအတွက် ထိုင်းနိုင်ငံသားများနှင့် မြန်မာနိုင်ငံသား အများအပြား သွေးသွားရောက်လှူဒါန်းခဲ့ကြောင်း မဲဆောက်အခြေစိုက်ထိုင်းသတင်းသမားတဦးထံမှသိရသည်။
၎င်းရဲတပ်ကြပ်ကြီးသည် ယမန်နေ့(ဇန် နဝါရီ ၂၀)ရက်တွင် မဲဆောက်မြို့၌ တရားမဝင်ပစ္စည်းများ ဖမ်းဆီးစဉ် တရားခံ ၁ ဦး၏ ပစ်ခတ်မှုကြောင့် ပြင်းထန်စွာ ဒဏ်ရာရရှိခဲ့ခြင်းဖြစ်သည်။ ရဲတပ်ကြပ်ကြီး အတွက် မဲဆောက်ဆေးရုံကြီးတွင် ယနေ့တွင် သွေးသွားရောက်လှူဒါန်းခဲ့ကြခြင်းဖြစ်သည်။
မဲဆောက်မြို့၊ မယ်ကုရပ်ကွက်၊ စက်ရုံတရုံဘေးရှိ 7-Eleven အနီးတွင် ယမန်နေ့ ၌ ရဲတပ်ဖွဲ့ဝင်အား မြန်မာနိုင်ငံသား အမျိုးသား ၁ ဦးက သေနတ်ဖြင့် ပစ်ခတ်ခဲ့ခြင်းဖြစ်ကြောင်း ထိုင်းသတင်းများက ဖော်ပြခဲ့သည်။ ယမန်နေ့တွင် တရားခံ ၁ ဦးကို ဖမ်းဆီးရမိထားပြီး သေနတ်ဖြင့် ပစ်ခတ်ခဲ့သူမှာ ထွက်ပြေးနေဆဲဖြစ်သည်။
ယနေ့ ဇန်နဝါရီလ ၂၁ ရက်နေ့ နံနက် ၁၁ နာရီခန့်တွင် တာ့ခ်ခရိုင် မှုခင်းဆေးစစ်ချက်ဌာနမှ တာဝန်ရှိသူများသည် အခင်းဖြစ်ပွားရာနေရာနှင့် မနီးမဝေးရှိ ကြံစိုက်ခင်းအတွင်း တရားခံစွန့်ပစ်ထားခဲ့သော အဝတ်အစားများ၊ လွယ်အိတ်နှင့် သေနတ်တို့ကို သိမ်းဆည်းရမိခဲ့ကြောင်း သိရသည်။
လတ်တလောတွင် တရားခံကို ရှာမတွေ့သေးဘဲ တာဝန်ရှိသူများက ယမန်နေ့မှစကာ တနေ့လုံး ၊ တညလုံး ပိတ်ဆို့ရှာဖွေမှုများပြုလုပ်နေကြောင်း ထိုင်းသတင်းများကဖော်ပြသည်။
ပစ်ခတ်ခံခဲ့ရသည့် မဲဆောက်ရဲစခန်းမှ ရဲတပ်ကြပ်ကြီးသည် ခွဲစိတ်ကုသမှု ခံယူပြီးနောက် လက်ရှိတွင် မဲဆောက်ဆေးရုံကြီး၏ အထူးကြပ်မတ်ကုသဆောင် (ICU) တွင် ရှိနေကြောင်းသိရသည်။
Photo Maesot Police#thailand