ဖားကန့်မြို့တွင် မိုးသည်းထန်စွာရွာသွန်းမှုကြောင့် မြေပြိုမှု၊ ရေကြီးရေလျှံမှုများဖြစ်ပွား

ဖားကန့်မြို့ မော်ဝမ်းရပ်ကွက်အတွင်း ရေကြီးရေလျှံမှုနှင့် မြေပြိုမှုဖြစ်ပွားမှုကြောင့် လူနေအိမ်တွေ ထိခိုက်ပျက်စီးမှုရှိ 😥July 19 2026

ဖားကန့်မြို့တွင် မိုးသည်းထန်စွာရွာသွန်းမှုကြောင့် မြေပြိုမှု၊ ရေကြီးရေလျှံမှုများဖြစ်ပွားပြီး နေအိမ်တစ်လုံး မြေပြိုပိပျက်စီး၊ ရေနစ်မြှုပ်နေသည့် ရပ်ကွက်များမှ ပြည်သူများကို ကယ်ဆယ်ရန် လှေ၊ အသက်ကယ်အင်္ကျီနှင့် ရေပေါ်ပေါ်နိုင်သည့် ပစ္စည်းများ အရေးပေါ်လိုအပ်နေ

ဇူလိုင် ၁၉

ကချင်ပြည်နယ်၊ ဖားကန့်မြို့နယ်တွင် ရက်ဆက်မပြတ် မိုးသည်းထန်စွာ ရွာသွန်းနေမှုကြောင့် မြေပြိုမှုနှင့် ရေကြီးရေလျှံမှုများ ဆက်တိုက်ဖြစ်ပွားနေပြီး မြေပြိုကျမှုကြောင့် နေအိမ်တစ်လုံး ပျက်စီးဆုံးရှုံးခဲ့သည့်အပြင် မြို့ပေါ်ရပ်ကွက်အများအပြား ရေနစ်မြှုပ်နေသဖြင့် ပိတ်မိနေသော ပြည်သူများကို ကယ်ဆယ်ပြောင်းရွှေ့နိုင်ရေးအတွက် လှေများ၊ အသက်ကယ်အင်္ကျီများနှင့် ကယ်ဆယ်ရေး ပစ္စည်းများ အရေးပေါ်လိုအပ်နေကြောင်း ဖားကန့်ဒေသခံ သတင်းရင်းမြစ်များက ပြောသည်။

ယနေ့ ဇူလိုင် ၁၉ ရက် နံနက် ၁၁ နာရီဝန်းကျင်အချိန် ဖားကန့်မြို့၊ မှော်ဝမ်းရပ်ကွက်ရှိ ဖားကန့်ရိုးရာရုံးလမ်း၌ မိုးသည်းထန်စွာ ရွာသွန်းပြီးနောက် မြေပြိုကျမှု ဖြစ်ပွားခဲ့ရာ နေအိမ်တစ်လုံးပေါ်သို့ မြေသားများ ပြိုကျခဲ့သဖြင့် နေအိမ်ပျက်စီးဆုံးရှုံးခဲ့ကြောင်း သိရှိရသည်။

ထို့အပြင် ဇူလိုင် ၁၈ ရက်နေ့ ညနေပိုင်းမှစတင်၍ မြင့်တက်လာသော ကံဆည်းချောင်းရေမှာ ယနေ့ ဇူလိုင် ၁၉ ရက် နေ့လယ်ပိုင်းအထိ ဆက်လက်မြင့်တက်နေပြီး ဖားကန့်မြို့ရှိ မြေညီထပ်နေအိမ် အများအပြား ရေနစ်မြှုပ်လျက်ရှိကြောင်း၊ ရေနစ်မြှုပ်နေသည့် ရပ်ကွက်များတွင် သက်ကြီးရွယ်အိုများ၊ ကလေးငယ်များနှင့် အမျိုးသမီးများ အပါအဝင် ပြည်သူအများအပြား ပိတ်မိနေကြောင်း သိရသည်။

ဒေသတွင်း လူမှုကယ်ဆယ်ရေးအဖွဲ့များက ရေနစ်မြှုပ်နေသော နေအိမ်များသို့ လိုက်လံကယ်ဆယ်ရေးလုပ်ငန်းများ ဆောင်ရွက်နေသော်လည်း လှေများ မလုံလောက်ခြင်းနှင့် ရေပေါ်ပေါ်နိုင်သည့် အထောက်အကူပြုပစ္စည်းများ ရှားပါးနေခြင်းကြောင့် ကယ်ဆယ်ရေးလုပ်ငန်းများ အခက်အခဲများနှင့် ရင်ဆိုင်နေရကြောင်း သိရသည်။

"ညကတည်းက ရေက ဆက်တိုက်တက်လာတာ။ အခုအချိန်မှာ အခက်အခဲဖြစ်နေတာက ပြည်သူတွေထက် ကယ်ဆယ်ရေးအဖွဲ့တွေပဲ။ ပိတ်မိနေတဲ့ ပြည်သူတွေကို သွားခေါ်ဖို့ လှေမလုံလောက်ဘူး။ အသက်ကယ်အင်္ကျီလိုမျိုး ရေပေါ်ပေါ်နိုင်တဲ့ ပစ္စည်းတွေလည်း လိုနေတယ်။ အဲဒီပစ္စည်းတွေမရှိတော့ လူတွေကို အမြန်ကယ်ထုတ်ဖို့ အခက်အခဲဖြစ်နေပါတယ်" ဟု ဖားကန့်ဒေသခံ သတင်းရင်းမြစ်တစ်ဦးက ပြောသည်။

၎င်းက ဆက်လက်၍ "အခုလို ရေက ဆက်တက်နေဦးမယ်ဆိုရင် ဒီနေ့ညပိုင်းမှာ အခြေအနေက ပိုဆိုးလာနိုင်တယ်။ ရေနစ်နေတဲ့ နေအိမ်တွေ ပိုများလာနိုင်သလို ပြည်သူတွေအတွက် စားနပ်ရိက္ခာ၊ သောက်သုံးရေ၊ ဆေးဝါးတွေ အရေးပေါ်လိုလာမှာ သေချာပါတယ်။

ဖားကန့်မြို့နယ်တွင် ယခုရက်ပိုင်းအတွင်း မိုးအဆက်မပြတ် ရွာသွန်းနေခြင်းကြောင့် ဥတုချောင်းနှင့် ကံဆည်းချောင်းတို့၏ ရေမျက်နှာပြင်မှာ ဆက်လက်မြင့်တက်နေပြီး ရေကြီးရေလျှံမှုမှာလည်း မကြာခဏဆိုသလို ကျယ် ကျယ်ပြန့်ပြန့် ဖြစ်ပွားလာလျက်ရှိကြောင်း ဒေသခံများက ဆိုသည်။

ရေနစ်မြှုပ်သွားသည့် နေအိမ်များမှ ပြည်သူအများစုမှာ နေအိမ်များအတွင်း ပိတ်မိနေဆဲဖြစ်ပြီး အချို့မှာ နီးစပ်ရာ မြင့်မားသည့်နေရာများနှင့် ဆွေမျိုးသားချင်းများ၏ နေအိမ်များသို့ ယာယီရွှေ့ပြောင်းနေကြရကြောင်း သိရသည်။

"လက်ရှိမှာ ရေနစ်နေတဲ့အိမ်တွေက လူတွေကို အဓိကလိုတာက ထမင်းဘူး၊ သောက်ရေသန့်နဲ့ အခြေခံစားသောက်ကုန်တွေပါ။ တချို့အိမ်တွေက မီးလည်းပြတ်၊ လမ်းလည်းပြတ်သွားတော့ အပြင်ထွက်ဝယ်လို့ မရတော့ဘူး။ ပြည်သူတွေအနေနဲ့ တတ်နိုင်သလောက် ဝိုင်းဝန်းကူညီပေးကြဖို့ မေတ္တာရပ်ခံချင်ပါတယ်" ဟု ဒေသခံတစ်ဦးက ပြောသည်။

ဒေသခံများနှင့် လူမှုကူညီရေးအဖွဲ့များက ရေဘေးသင့်ပြည်သူများအတွက် လှေများ၊ အသက်ကယ်အင်္ကျီများ၊ ကယ်ဆယ်ရေးပစ္စည်းများ၊ ထမင်းဘူးများ၊ သောက်သုံးရေများနှင့် အရေးပေါ်အသုံး အဆောင်ပစ္စည်းများ အမြန်ဆုံးလိုအပ်နေကြောင်း ပြောဆိုထားပြီး ရာသီဥတုအခြေအနေ ဆိုးရွားနေသဖြင့် ရေမျက်နှာပြင် ထပ်မံမြင့်တက်လာနိုင်သည့် အန္တရာယ်ရှိနေကြောင်း သတိပေးထားသည်။

#pharkant

#flood

#myanmar

#NaturalDisaster

#zyrp /ประเทศไทย